Tuesday, November 27, 2007

ബൂലോകം പോയ വാരം : ലക്കം പതിമൂന്ന്

പൊതുവേ ശാന്തമായ വാരത്തിലൂടെയാണ് ബൂലോകം കടന്നു പോയത്. അറിയാവുന്നത് മറ്റുള്ളവരിലേക്ക് പകര്‍ന്നു കൊടുക്കാനുള്ള ബൂലോക സൌഹൃദമായിരുന്നു പോയ വാരത്തെ പ്രത്യേകത. മോഷണം,പിടിച്ച് പറി, തൊണ്ടി കണ്ടെത്തല്‍, വിശ്വാസികളും നിരീശ്വര വാദികളും തമ്മിലുള്ള നിലക്കാത്ത സംവാദം, പോസ്റ്റിന് കമന്റ് പിന്നെ കമന്റ് തന്നെ പോസ്റ്റ്, തുടങ്ങി പതിവു പോലെ സജീവം ബൂലോകം. വാരവിചാരവും കടന്നു വരുന്നു പോയ വാരത്തെ ബൂലോക നേര്‍ കാഴ്ചകളുമായി.

1. സാര്‍ത്ഥവാഹക സംഘത്തോടൊപ്പം
ഇത്തിരിവെട്ടത്തിന്റെ സാര്‍ത്ഥവാഹക സംഘത്തോടൊപ്പം എന്ന ഖണ്ഡശ്ശയായി പ്രസിദ്ധീകരിച്ചു കൊണ്ടിരിക്കുന്ന ലേഖനം അതിന്റെ അവതരണ ഭംഗി കൊണ്ടും ചര്‍ച്ച ചെയ്യുന്ന വിഷയത്തിന്റെ പ്രാധാന്യം കൊണ്ടും ബൂലോകത്ത് വേറിട്ട് നില്‍ക്കുന്നു. സമത്വത്തിന്റെയും സാഹോദര്യത്തിന്റേയും ശാന്തിയുടേയും നേര്‍മതമായ ഇസ്ലാമിനെ അതിന്റെ നന്മ ഒട്ടും ചോര്‍ന്നു പോകാതെ വരച്ചു വെക്കാന്‍ ഇത്തിരിവെട്ടത്തിന് കഴിഞ്ഞിരിക്കുന്നു. ലോകത്ത് ഏറ്റവും തെറ്റിദ്ധരിക്കപെട്ട മതം ഇസ്ലാമല്ലാതെ മറ്റൊന്നല്ല. ശാന്തിയുടേയും സമാധാനത്തിന്റേയും പരിഛേദമാകേണ്ട ഇസ്ലാമിനെ ഭീകരതയുടെ സ്വരൂപമാക്കി മാറ്റപ്പെടുന്ന ആധുനിക ലോകത്ത് ഇസ്ലാമിന്റെ നന്മയെ കുറിച്ച് പറയുന്നവരെല്ലാം ഭീകരനായി മുദ്രകുത്തപ്പെടുന്നിടത്ത് ഇസ്ലാം മുന്നോട്ട് വെക്കുന്ന നന്മകള്‍ ചര്‍ച്ച ചെയ്യപ്പെടാതെ പോകുന്നു. അവിടെയാണ് ഇത്തിരി വിജയിക്കുന്നത്. “സാര്‍ത്ഥവാഹക സംഘത്തോടൊപ്പം” ഇസ്ലാം മതത്തിന്റെ നന്മകളും മാനവലോകത്തിന് ഇസ്ലാം നല്‍കുന്ന ശാന്തിയുടേയും സമാധാനത്തിന്റേയും സന്ദേശങ്ങളും അയത്ന ലളിതമായി ഇത്തിരിവെട്ടം വരച്ചു വെച്ചിരിക്കുന്നു. ഒരു മതാധിഷ്ടിത കുറിപ്പിന്റെ മടുപ്പ് ഒരിക്കലും ഉളവാക്കുന്നില്ല ഇത്തിരിയുടെ ശൈലി. അങ്ങേയറ്റം സൂഷ്മതയോടെ അല്പം പോലും തിരക്കില്ലാതെ അതീവ ശ്രദ്ധയോടെ അടുക്കും ചിട്ടയുമായി “സാര്‍ത്ഥവാഹക സംഘം” നിശ്ശബ്ദം യാത്ര തുടരുന്നു. കോലാഹലങ്ങളില്ലാതെ, അവകാശവാദങ്ങളില്ലാതെ, ഹിറ്റ് കൂട്ടാനോ കമന്റു മഴ പെയ്യിക്കാനോ തന്ത്രങ്ങള്‍ മെനയാതെ ഇത്തിരിവെട്ടം “സാര്‍ത്ഥവാഹക സംഘത്തോടൊപ്പം” പതുക്കെ നീങ്ങുമ്പോള്‍ ബൂലോകത്തിന് അത് പുതിയൊരനുഭവമാണ്.

പതിനഞ്ചാം അദ്ധ്യായത്തിലെത്തി നില്‍ക്കുന്ന “സാര്‍ത്ഥവാഹക സംഘത്തോടൊപ്പം” ഒരു പക്ഷേ ബൂലോകത്ത് നിന്നും പുറത്ത് വരുന്ന മുന്നാമത്തെ പുസ്തകം ആയേക്കാം. കാരണം ഇത്രയും ശ്രദ്ധയോടെ അവതരിച്ചിട്ടുള്ള മറ്റൊരു പോസ്റ്റും ബൂലോകം നാളിതു വരെ കണ്ടിട്ടില്ല എന്നത് തന്നെ. പൊതുവാളിന്റെ ആസ്വാദനകുറിപ്പ് “സാര്‍ത്ഥവാഹക സംഘത്തിന്റെ” നെറുകയില്‍ ചാര്‍ത്തിയ പൊന്‍ തൂവലായി.

2. ചതുരാകൃതിയിലുള്ള പഞ്ചഭുജ ത്രികോണം
പോയ വാരം ഏറ്റവും കൂടുതല്‍ ചര്‍ച്ച ചെയ്യപ്പെട്ട പോസ്റ്റ് ജബ്ബാര്‍ മാഷിന്റെ “ചതുരാകൃതിയിലുള്ള പഞ്ചഭുജ ത്രികോണം” ആയിരുന്നു. ഏവൂരാന്‍ തുടങ്ങിവെച്ച ചര്‍ച്ച യുക്തിവാദികളും ഈശ്വരവിശ്വാസികളും തമ്മിലുള്ള ഒരു മല്‍പ്പിടുത്തമാകാതെ ക്രിയാത്മകമായി വസ്തുനിഷ്ടമായി മുന്നോട്ട് പോയി. ചര്‍ച്ചയില്‍ പങ്കെടുത്തവരെല്ലാവരും സ്വയം മോഡറേറ്ററന്മാരായി മാറുന്ന കാഴ്ചയും ഈ പോസ്റ്റു കൊണ്ടു വന്നു. ഒരിക്കലും അതിരുകള്‍ വിടാതെ അവരവരുടെ വാദമുഖങ്ങള്‍ അവതരിപ്പിക്കാന്‍ പങ്കെടുത്തവര്‍ക്കെല്ലാം കഴിഞ്ഞു എന്നത് ബൂലോകത്തെ അപൂര്‍വ്വ കാഴ്ചകളിലൊന്നാണ്. നിരീശ്വരവാദവും ഈശ്വരവിശ്വാസവും എപ്പോഴും സമാന്തരമാണെന്നതു കൊണ്ട് തന്നെ ഈ ചര്‍ച്ച സമവായത്തില്‍ എത്തുമെന്ന് പ്രതീക്ഷിച്ചു കൂടല്ലോ. എന്തായാലും പോസ്റ്റിനെ വെല്ലുന്ന നിരവധി കമന്റുകളാല്‍ സമ്പന്നമാണ് “ചതുരാകൃതിയിലുള്ള പഞ്ചഭുജ ത്രികോണം.”

3. സാറാ ജോസഫിനെതിരേ ജീ.സുധാകരന്റെ തെറിയഭിഷേകം.
ബി.ആര്‍.പി.ഭാസ്കറിന്റെ പോസ്റ്റ് ആത്മരോഷം ഉളവാക്കുന്നത് കേരളാ കൌമുദിയുടെ വാര്‍ത്തയിലൂടെ കണ്ണോടിക്കുമ്പോഴാണ്. രാജ്യം ഭരിക്കുന്ന ഒരു മന്ത്രി കേരളം കണ്ട എക്കാലത്തേയും നല്ല എഴുത്തുകാരികളില്‍ ഒരാളെ സംബോധന ചെയ്തിരിക്കുന്ന രീതിയും തൊടുത്ത് വിട്ടിരിക്കുന്ന വാക്കുകളും എല്ലാ പരിതികളും ലംഘിച്ചിരിക്കുന്നു. ആ വാര്‍ത്ത വായിച്ച് കഴിയുമ്പോള്‍ ഇവനൊക്കെ എങ്ങിനെ മന്ത്രി പദത്തില്‍ ചേക്കേറി എന്ന് സ്വയം ചോദിക്കേണ്ടി വരുന്നു. മലയാളത്തിന്റെ ദുര്യോഗം അല്ലാതെന്ത് പറയാന്‍.

4. നക്ഷത്ര വേശ്യയിലേക്കൊരു പാലം
മൈനയുടെ ആസ്വാദനം. ഹസ്സന്‍ നാസിര്‍ എഴുതിയ “നഗര വാതില്‍ക്കലെ രക്ഷകന്‍” വായിച്ചപ്പോള്‍ എഴുത്ത് കാരികൂടിയായ വായനക്കാരിക്ക് തോന്നിയ അസ്വസ്ഥതകളും ആശങ്കളും ഏതാനും വരികളിലൂടെ ബൂലോകരുമായി സംവേദിക്കാന്‍ മൈനക്ക് കഴിഞ്ഞിരിക്കുന്നു. ആസ്വാദനം വായിച്ച് കഴിയുമ്പൊള്‍ നോവല്‍ ഒറ്റയിരിപ്പിന് വായിച്ച പ്രതീതി അനുവാചകനില്‍ ജനിക്കുന്നതോടൊപ്പം നോവല്‍ മുന്നോട്ട് വെക്കുന്ന സമൂഹ്യ പ്രശ്നം വെള്ളിടിയായി മസ്തിഷ്കത്തിലേക്ക് ഇരച്ചു കയറുകയും ചെയ്യുന്നു.

5. സ്വയാശ്രയം മുക്കുവന്റെ നോട്ടത്തില്‍
മുക്കുവന്റെ പോസ്റ്റ്. “സ്വയാശ്രയ സ്ഥാപനം എന്നാല്‍ വരവുചിലവുകള്‍ സ്വന്തമായി നിയന്ത്രിക്കാന്‍ കഴീവുള്ള സ്ഥാപനം എന്നര്‍ത്ഥം. അത് ഒരു ജുവലറി ഷോപ്പോ, സുപ്പര്‍ ബസാറോ, ദിനേശ് ബീഡിയോ, കള്ള് ഷാപ്പോ, കോളേജോ ആകാം. അങ്ങനെയുള്ള ഒരു സ്ഥാപനങ്ങളും അവരുടെ വരുമാനത്തിന്റെ പകുതി പാവങ്ങള്‍ക്ക് വെറുതെ കൊടുക്കാന്‍ ഒരു സര്‍ക്കാര്‍ പറയുന്നതില്‍ എന്താണൊരു ന്യായം?” മുക്കുവന്റെ ഈ ചോദ്യത്തിന് മുക്കുവന്‍ തന്നെ ഉത്തരം നല്‍കുന്നു. ശ്രദ്ധയര്‍ഹിക്കുന്ന ഒരു പോസ്റ്റിന് അര്‍ഹിക്കുന്ന ശ്രദ്ധ ലഭിച്ചില്ല.

6. ഓന്തുകള്‍
കരീം മാഷിന്റെ പോസ്റ്റ്. നാലുമരണങ്ങളോടുള്ള സമൂഹത്തിന്റെ സമീപനമാണ് ഇതിവൃത്തം. ഏതാനും വരികളില്‍ “അന്നും ഇന്നും” ചിന്തക്ക് തീ കൊളുത്തുന്നു. നല്ലൊരു സാമൂഹ്യ വിമര്‍ശനം.

7. മനുഷ്യ പരിണാമത്തിന്റെ പത്തവതാരങ്ങള്‍
എബിജോണിന്റെ മാവേലിരാജ്യ ധര്‍മ്മ പീഠത്തില്‍ നിന്നും വന്ന പോസ്റ്റ്. ദശാവതാരങ്ങളെ പുതിയൊരു വീക്ഷണകോണില്‍ നിന്നും നോക്കികാണുകയാണ് എബിജോണ്‍. “ദശാവതാര ആശയത്തില്‍ അടങ്ങിയിരിക്കുന്നതു് മനുഷ്യപരിണാമത്തിന്റെ പത്തു് ഘട്ടങ്ങളാണെന്ന്” പറഞ്ഞ് തുടങ്ങുന്ന എബി ജോണ്‍ “അസുരരുടെ മേല്‍ സുരന്മാരുടെ വിജയം ഉറപ്പിയ്ക്കാനും അസുരരെ പരമാവധി അപകീര്‍ത്തിപ്പെടുത്തുവാനും ദുഷിയ്ക്കുവാനും ബ്രാഹ്മണാധിപത്യം നിലനിറുത്തുന്ന ജാതിവ്യവസ്ഥയെ സംരക്ഷിയ്ക്കുവാനും ഉപയോഗപ്പെടുന്ന വിധത്തിലാണു് ദശാവതാര കഥകള്‍ ചമച്ചിട്ടുള്ളത്” എന്ന് പറഞ്ഞ് വെക്കുമ്പോള്‍ ദശാവതാരങ്ങള്‍ക്ക് അങ്ങിനെയൊരു ധര്‍മ്മവും ഉണ്ടായിരുന്നില്ലേ എന്ന് തോന്നി പോകുന്നു. അതീവ ശ്രദ്ധയര്‍ഹിച്ചിരുന്ന ഒരു പോസ്റ്റ് ശ്രദ്ധിക്കപ്പെടാതെ പോയി. വായിക്കപ്പെടേണ്ട ഒരു പോസ്റ്റാണ് “മനുഷ്യ പരിണാമത്തിന്റെ പത്തവതാരങ്ങള്‍”

8. കോഴിയങ്കം
മലബാറിയുടെ പോസ്റ്റ്. നിരോധിക്കപ്പെട്ട കോഴിയങ്കങ്ങള്‍ കാസര്‍ഗോഡ് ജില്ലയിലെ വടക്കേ അതിര്‍ത്തിയില്‍ വീണ്ടും സജീവമാകുന്നതിനെ കുറിച്ചുള്ള പോസ്റ്റ് ശ്രദ്ധേയമാകുന്നത് ഫോട്ടോകളുടെ പിന്തുണയോടെ മലബാറി കൊടുത്തിരിക്കുന്ന വിശദീകരണങ്ങള്‍ കൊണ്ടാണ്.

9. ഹാപ്പി ബ്ലോഗിങ്ങ്
“ഒരു പുതിയ ബ്ലോഗ് ചെയ്യുമ്പോള്‍ അതിലെ സെറ്റിങ്സിനെക്കുറിച്ച് പലരും സംശയമുന്നയിച്ച് കേട്ടിട്ടുണ്ട്. ബ്ലോഗ് സെറ്റിങ്ങ് , വേര്‍ഡ് വെരിഫിക്കേഷന്‍, കമന്റുകളില്‍ എങ്ങനെ ലിങ്ക് കൊടുക്കാം അങ്ങനെയങ്ങനെ... ഇവിടെ ഈ പോസ്റ്റില്‍ എനിക്കറിയാവുന്ന ചില കാര്യങ്ങള്‍ പറയുന്നു. എല്ലാം പൂര്‍ണ്ണമാകണമെന്നില്ല. അറിയാവുന്ന ചില കാര്യങ്ങള്‍ ഞാന്‍ ഇവിടെ പറായാന്‍ ശ്രമിക്കുന്നു, ആര്‍ക്കെങ്കിലും ഉപകരിച്ചാലോ..”
സഹയാത്രികന്റെ വാക്കുകള്‍. ബ്ലോഗറില്‍ ലോഗിന്‍ ചെയ്യുന്നതു മുതല്‍ പോസ്റ്റ് പബ്ലിഷ് ചെയ്യുന്നത് വരെയുള്ള സാങ്കേതികമായ സംഗതികള്‍ ലളിതമായി വിവരിച്ചിരിക്കുന്ന സഹയാത്രികന്റെ ശ്രമം നല്ലൊരു വഴികാട്ടിയാണ്.

10. വെരി ഹാപ്പി ബ്ലോഗിങ്ങ്
പേര് പേരക്കായുടെ പോസ്റ്റ്. ബ്ലോഗുകളെ എങ്ങിനെ കൂടുതല്‍ ആകര്‍ഷകവും ഫലപ്രദവും ആക്കാമെന്ന് ചൂണ്ടികാണിക്കുകയാണ് പേരക്ക ഈ പോസ്റ്റിലൂടെ. ബ്ലോഗിങ്ങ് എങ്ങിനെ എന്തിന് ആര്‍ക്കു വേണ്ടി തുടങ്ങിയ ചോദ്യങ്ങള്‍ക്കൊക്കെ പൂര്‍ണ്ണമായും ഉത്തരം നല്‍കാന്‍ ആര്‍ക്കും കഴിയുമെന്ന് തോന്നുന്നില്ല. എങ്കിലും ബ്ലോഗിങ്ങിന്റെ പ്രസക്തിയെ കുറിച്ചുള്ള അടിസ്ഥാന പരമായ പല ചോദ്യങ്ങള്‍ക്കും ഉത്തരം നല്‍കാന്‍ ഈ പേരക്കാ പോസ്റ്റിന് കഴിയുന്നുണ്ട്.

11. വീണ്ടും മകരജ്യോതി കത്തിക്കുമ്പോള്‍
മകരജ്യോതീ സംവാദം സമവായത്തിലെത്തിയതായിരുന്നു-ബൂലോകത്ത്. എന്നിരുന്നാലും മറ്റൊരു മണ്ഡലകാലത്ത് മകരജ്യോതി കേരളക്കരയില്‍ ചര്‍ച്ചയാകുമ്പോള്‍ മലയാളത്തിന്റെ നേരെ പിടിച്ച കണ്ണാടിയായ ബൂലോകത്തും അനുരണങ്ങള്‍ ഉണ്ടാകാതെ തരമില്ലല്ലോ? പക്ഷേ ഡി. പ്രദീപ് കുമാറിന്റെ മകരജ്യോതി പോസ്റ്റ് പ്രസക്തമാകുന്നത് ശബരിമല നല്‍കുന്ന നന്മകളെ ചോദ്യം ചെയ്യാതെ മകരജ്യോതിയിലെ കാണാപ്പുറങ്ങള്‍ തേടുകയാണ് എന്നതു കൊണ്ടാണ്. മകര ജ്യോതിമാത്രമാണോ ശബരി മലയുടെ ദിവ്യത്വത്തിന് ഹേതു? അല്ലേ അല്ല. സന്നിധാനം കേരളക്കരയുടെ മതസൌഹാര്‍ദ്ദത്തിന്റേയും ശാന്തിയുടേയും സമാധാനത്തിന്റേയും പ്രതീകം തന്നെയാണ്. ശബരിമലയുടെ പ്രാധാന്യം ഒരു ജ്യോതിയില്‍ തട്ടി ഇല്ലാതാകരുത്. മകരജ്യോതി ഏതെങ്കിലും തരത്തിലുള്ള തട്ടിപ്പല്ലാ എന്ന് വിശ്വാസിക്കാനാണ് വിചാരിപ്പ്കാരനിഷ്ടം. അഥവാ ഏതെങ്കിലും തരത്തിലുള്ള നീച ഇടപെടലുകള്‍ മകര ജ്യോതിയുടെ കാര്യത്തില്‍ ഉണ്ട് എങ്കില്‍ അതിന്റെ പേരില്‍ ശബരിമലയുടെ ദിവ്യത്വം അസ്തമിക്കപ്പെട്ടും കൂട.

12. ഉടുമ്പ്
ചക്രം ചവയുടെ പോസ്റ്റ്. ഫോട്ടോ പോസ്റ്റ് കൌതുകം ഉണര്‍ത്തി.. ദേവേന്റെ കമന്റാണ് ഈ ഫോട്ടോ പോസ്റ്റിന്റെ കാതല്‍.

13. ആഭരണങ്ങള്‍ (ഇമിറ്റേഷന്‍ ജ്യൂവല്ലറി)
അതുല്യായുടെ ബ്ലോഗ്. ബൂലോകത്ത് സജീവമായ അതുല്യയുടെ പുതിയ ബ്ലോഗാണ് “ആഭരണങ്ങള്‍”. വീട്ടിലെ വിരസമായ നിമിഷങ്ങളെ ഉല്ലാസപ്രദവും ഉപയോഗപ്രദവുമാക്കാന്‍ അതുല്യായുടെ ബ്ലോഗ് നാരികളെ സഹായിക്കുന്നു. നരന്മാര്‍ക്കും “ഒന്നര ടണ്‍” ക്ഷമയുണ്ടെങ്കില്‍ വീട്ടില്‍ തന്നെ ഇമിറ്റേഷന്‍ ആഭരണങ്ങള്‍ ഉണ്ടാക്കാം. സുന്ദരിക്കുണുക്കളുമായി വന്ന ബ്ലോഗില്‍ ഇപ്പോള്‍ മൂന്ന് പോസ്റ്റ്. മൂന്നും ഗുണപ്രദം. പരീക്ഷിക്കൂ...ക്ഷമയുണ്ടെങ്കില്‍ മാത്രം. പക്ഷേ അറിഞ്ഞത് പറഞ്ഞ് കൊടുക്കാനുള്ള അതുല്യായുടെ ശ്രമം ശ്ലാഘനീയം.

14. മലയാളം യൂണിക്കോഡ് ഫോണ്ടുകള്‍
“മലയാള അക്ഷരങ്ങള്‍ക്കായി എത്ര യൂണിക്കോഡ് ഫോണ്ടുകള്‍ - Malayalam Unicode Fonts - ലഭ്യമാണ്?” ഈ ചോദ്യത്തുനുള്ള ഉത്തരം തേടി സെബിന്‍ എബ്രഹാം ജേക്കബ് നടത്തിയ യാത്രയുടെ ഫലം. മലയാളത്തില്‍ ലഭ്യമായ യൂണീക്കോഡ് ഫോണ്ടുകളെ കഴിയുന്നിടത്തോളം ഒരിടത്ത് ഒരിമിച്ച് കൂട്ടാന്‍ സെബിന്‍ എബ്രഹാം ജേക്കബിന് കഴിഞ്ഞിട്ടുണ്ട് എന്ന് കമന്റുകള്‍ പറയുന്നു.

15. ഉണ്ടിരുന്ന വെളിയത്തിന് വിളി വന്നാല്‍
മാരിചന്റെ പോസ്റ്റ്. ഏതൊരു മലയാളിയുടെയും ആത്മരോഷമാണ് മാരിചന്‍ ഈ പോസ്റ്റിലൂടെ പറഞ്ഞ് വെക്കുന്നത്. “ദാറ്റ്സ് മലയാളത്തില്‍” വന്ന പോസ്റ്റ് ബ്ലോഗിലേക്ക് വന്നതാണ്. കേരളത്തിന്റെ നാണക്കേടാണ് ഇന്ന് ആളില്ലാ നേതാപാര്‍ട്ടിയായ സി.പി.ഐ. എന്നതില്‍ യാതൊരു തര്‍ക്കവുമില്ല.

16. സുജിത് ഭക്തനും തൊണ്ടി സാധനവും.
ബ്ലോഗ് ശ്രീ ഓണ്‍ ലൈന്‍ മാസികയില്‍ എക്സ്ക്ലൂസീവായി വന്ന “എഷ്യാനെറ്റ് ജനങ്ങളെ വഞ്ചിക്കുന്നു” എന്ന പോസ്റ്റ് അനില്‍ ശ്രീയുടെ ബ്ലോഗില്‍ നിന്നും അടര്‍ത്തി മാറ്റിയതാണ് എന്ന സംഗതി അംഗീകരിക്കാതെ ഭക്തന്‍ വീണിടത്ത് കിടന്ന് ഉരുണ്ട കാഴ്ച അരോചകമായിരുന്നു. ഏറ്റവും പരിഹാസ്യമായത് ഈ ചര്‍ച്ചയുടെ ഒരുഭാഗത്ത് സുജിത് ഭക്തന്‍ “ശബരിമലയെ” ശഭരിമലയാക്കാന്‍ ശ്രമിച്ചതാണ്. ഒരു തെറ്റ് ഒരാള്‍ ചൂണ്ടികാട്ടിയാല്‍ അതിനെ അംഗീകരിക്കാന്‍ തയ്യാറാകാതെ വീണിടത്ത് കിടന്നുരുണ്ട് പുറമാകെ ചേറായി ഒടിഞ്ഞു കുത്തി നില്‍ക്കേണ്ട കാര്യമൊന്നും ബൂലോകത്തില്ലാല്ലോ.

17. സായിപ്പല്ലേ..കവാത്ത് മറന്നതാകും.
ഏ.ആര്‍. നജീം കൊണ്ടു വന്ന പോസ്റ്റ്. ഭാ‍രതത്തിന്റെ ദേശീയ പതാക ജയ്പൂരില്‍ വെച്ച് നടന്ന ഇന്‍‍ഡ്യാ പാകിസ്ഥാന്‍ ക്രിക്കറ്റ് മാച്ചിനിടയില്‍ മേശവിരിയാക്കിയതിനെയും പതാകക്ക് മുകളില്‍ മദ്യ ഗ്ലാസ് വെച്ചതിലേക്കുമാണ് നജീം പോസ്റ്റിലൂടെ ശ്രദ്ധക്ഷണിക്കുന്നത്. “ഒരു സ്വാതന്ത്ര്യ ദിനത്തില്‍ നമ്മുടെ ഒരു സര്‍ക്കാര്‍ ഓഫീസിലെ പ്യൂണ്‍ ഈ പതാക തലകീഴായി ഉയര്‍ത്തിയപ്പോള്‍ രക്തം തിളച്ച നമ്മള്‍ സായിപ്പിനെ കണ്ടപ്പോള്‍ കവാത്ത് മറന്നതാണോ?” നജീമിന്റെ ഈ ചോദ്യം പ്രസക്തമാണ്.

18. പാരകളുണ്ട് സൂക്ഷിക്കുക
സാബു പ്രയാറിന്റെ പോസ്റ്റ്. ടൈറ്റില്‍ കണ്ട് വിചാരിപ്പ്കാരനിട്ട് താങ്ങിയതായിരി‍ക്കും, കിട്ടിയതിരിക്കട്ടേയെന്ന് കരുതി കയറി ചെന്ന പോസ്റ്റാണ്. പക്ഷേ സാബു പ്രയാര്‍ പറഞ്ഞ് വെച്ചത് സൌദി അറേബ്യയിലെ മലയാളി പാരകളെ കുറിച്ചാണ്. ഫ്രീവിസയില്‍ സൌദിയിലെത്തി ജോലി തേടുന്ന മലയാളികള്‍ക്ക് സ്വന്തം നാട്ടുകാര്‍ ബുദ്ധിമുട്ടുകളുണ്ടാക്കുന്നതാണ് സാബു ചര്‍ച്ച ചെയ്യുന്നത്. സൌദിയിലെ വിസാ നിയമങ്ങളും മറ്റും ഒരു പോസ്റ്റായി ഇടാന്‍ സാബുവിന് കഴിയുമെങ്കില്‍ അത് സൌദിയിലേക്ക് വരുന്നവര്‍ക്ക് സഹായകമായേക്കും.

19. എന്താണ് വില്ലേജാഫീസുകള്‍
ചന്ദ്രശേഖരന്‍ നായരുടെ പോസ്റ്റ്. വില്ലേജാഫീസിലെ അഴിമതികളെ കുറിച്ചും വില്ലേജ് ആഫീസില്‍ ചെന്നാലുണ്ടാകുന്ന ബുദ്ധിമുട്ടുകളെ കുറുച്ചും കര്‍ഷകന്‍ നന്നായി എഴുതിയിരിക്കുന്നു. കിമ്പളമുണ്ടെങ്കില്‍ ഫയലുകള്‍ മിന്നല്‍ വേഗത്തില്‍ നീങ്ങും. ഇല്ലെങ്കില്‍ ഒച്ചിഴയുന്നതുപോലെ പോലും ഫയലുകള്‍ നീങ്ങില്ല. വില്ലേജാഫീസുകള്‍ അഴിമതി ആഫീസുകളായി മാറിയിരിക്കുന്നു.


20. ഫോട്ടോ ഗ്രാഫി ഒരു പഠനം
കൂട്ടുകാരന്റെ പോസ്റ്റ്. ഫോട്ടോഗ്രാഫിയുടെ സാങ്കേതിക വശങ്ങളെ ലളിതമായി വിവരിച്ചിരിക്കുന്നു. ക്യാമറ പിടിക്കുന്നതെങ്ങിനെയെന്നതാണ് ആദ്യ പോസ്റ്റ്. ഫോട്ടോ ഗ്രാഫിയെ കുറിച്ച് ആധികാരികമായി സംസാരിക്കാന്‍ കഴിയുന്ന ഒരാള്‍ കൂടി ബൂലോകത്തേക്കെത്തിയിരിക്കുന്നു എന്ന് കരുതാം.


പുനര്‍വായന.
ബ്ലോഗാഭിമാനി യാദൃശ്ചികമായാണ് കണ്ടത്. “സ്വതന്ത്ര ബ്ലോഗീയ ഇഷ്ടിക” ആദ്യത്തെ ഏഴ് ലക്കങ്ങളോടെ മാര്‍ച്ചില്‍ തിരശ്ശീലയിട്ടു. രസകരമായിരുന്നു ബ്ലോഗാഭിമാനിയുടെ അവതരണം. ബൂലോകത്തില്‍ ലോബികളുടേ സ്വാധീനം എന്ന പേരില്‍ വന്ന അവസാന പോസ്റ്റ് മുന്നോട്ട് വെച്ച വിഷയം അറമ്പറ്റിയതു പോലെയാണ് ബ്ലോഗാഭിമാനി പ്രസിദ്ധീകരണം നിര്‍ത്തി വെച്ചത്. ഏഴ് ലക്കങ്ങളിലായി ബ്ലോഗാഭിമാനി ആക്ഷേപം കലര്‍ന്ന നല്ല ഹാസ്യത്തില്‍ പറഞ്ഞ് വെച്ചത് എല്ലാം തന്നെ ബൂലോകത്തെ നേരുകളും നെറികളും നെറികേടുകളുമായിരുന്നു. ഇതുവരെ ബ്ലോഗാഭിമാനി കണ്ടിട്ടില്ലാത്താവര്‍ അവിടെയൊന്നു പോകണം. അന്നത്തെ ബൂലോകത്തിന്റെ ഒരു പരിഛേദം തന്നെയാണ് ആ ഏഴു ലക്കങ്ങളും.


വാരവിചാരത്തിന്റെ ബൂലോക കാണ്ഡം പതിമൂന്നാം ലക്കം ഇവിടെ അവസാനിക്കുന്നു. ഇതുവരെ “വിചാരത്തിന്” തന്ന ധാര്‍മ്മിക പിന്തുണക്കും വിമര്‍ശനങ്ങള്‍ക്കും നന്ദി. നിര്‍ദ്ദേശങ്ങള്‍ വിലപ്പെട്ടതാണ്. തെറ്റു തിരുത്താന്‍ വിമര്‍ശനങ്ങള്‍ക്കു കഴിയും. തുറന്ന മനസ്സോടെ “വിചാരത്തെ” ആര്‍ക്കും വിചാരിപ്പിന് വിധേയമാക്കാം.

18 comments:

അഞ്ചല്‍ക്കാരന്‍ said...

ബൂലോകം പോയ വാരം പതിമൂന്നാം ലക്കം ബൂലോക സമക്ഷം സമര്‍പ്പിക്കുന്നു.
നന്ദി.

വാല്‍മീകി said...

വളരെ നന്നായിട്ടുണ്ട് ഈ ലക്കവും.

അപ്പു said...

അഞ്ചല്‍ക്കാരാ. വളരെ നന്നായി. കാണാതെ പോയ പല ലേഘനങ്ങളും ഇവിടെ കണ്ടെത്താനായി. നന്ദി.

ബാജി ഓടംവേലി said...

പതിമൂന്നിലും ഏറ്റവും മികച്ചത്....
പതിമൂന്ന് നല്ല നമ്പര്‍‌ത്തന്നെ...
നന്നായിരിക്കുന്നു....

കുഞ്ഞന്‍ said...

5ല്‍ത്സിന്റെ പ്രയത്നത്തിനു വിലകല്പിക്കുന്നു..അഭിനന്ദനങ്ങള്‍..!

G.manu said...

:)

Areekkodan | അരീക്കോടന്‍ said...

കാണാതെ പോയ പല ലേഘനങ്ങളും കണ്ടെത്താനായി. നന്ദി.

ഭൂമിപുത്രി said...

ബുലോകത്തിലൊന്നു പെട്ടന്ന്കേറിയിറങ്ങണമെങ്കില്‍,
പ്രത്യേക ശ്രദ്ധയറ്ഹിക്കുന്ന ചിലയിടങ്ങള്‍ എടുത്തുപറയുന്ന ഈ കൊച്ചുനിരൂപണങ്ങള്‍ നല്ല ഉപകാരമാണ്‍.

സാബു പ്രയാര്‍ said...

അഞ്ചല്‍ക്കാരാ, വാരവിചാരം വായിച്ചു.
നന്നായിരിക്കുന്നു. വിമര്‍ശിക്കുന്നതില്‍ തെറ്റിദ്ധരിക്കരുത്. ആശയപരമായ ചില വിമര്‍ശനങ്ങള്‍ അഭിനന്ദനങ്ങളേക്കാള്‍ വിലയേറിയതാണെന്നോര്‍ക്കുക.

“വിസിറ്റ് വിസയില്‍ സൌദിയിലെത്തി ജോലി തേടുന്ന മലയാളികള്‍ക്ക് സ്വന്തം നാട്ടുകാര്‍ ബുദ്ധിമുട്ടുകളുണ്ടാക്കുന്നു ... “ എന്ന് പാരകളുടെണ്ട് സൂക്ഷിക്കുക എന്ന എന്റെ ലേഖനത്തില്‍ ഞാന്‍ എഴുതിയതായി താങ്കള്‍ വാരവിചാരത്തില്‍ സൂചിപ്പിക്കുകയുണ്ടായി. ‘വിസിറ്റ് വിസ എന്ന പ്രയോഗം ആ ലേഖനത്തിലില്ല. ഞാന്‍ പറഞ്ഞത്.. ഫ്രീ വിസ എന്നാണ്. വിസിറ്റ് വിസയും, ഫ്രീ വിസയും രണ്ടാണ്. വിസിറ്റ് വിസയില്‍ വരുന്നവര്‍ക്ക് ഇവിടെ ജോലി ചെയ്യുവാന്‍ ഇവിടുത്തെ നിയമം അനുവദിക്കുകയില്ല....

ചന്ദ്രശേഖരന്‍ നായര്‍ said...

വില്ലേജാഫീസുകള്‍ മാത്രമല്ല പഞ്ചായത്ത് ആഫീസും ഒട്ടും മോശമല്ല. തരികിട തോം..............

അഞ്ചല്‍ക്കാരന്‍ said...

സാബു പ്രയാര്‍,
തെറ്റു തിരുത്തിയിട്ടുണ്ട്. ചൂണ്ടി കാട്ടിയതിന് നന്ദി. യൂ.ഏ.യില്‍ ഫ്രീ വിസ എന്ന ഏര്‍പ്പാട് ഇല്ല. സ്വന്തം സ്പോണ്‍സറുടെ കീഴിലേ പണിയെടുക്കാന്‍ പാടുള്ളൂ. വിസിറ്റ് വിസയില്‍ വന്ന് ആള്‍ക്കാര്‍ നിയമവിരുദ്ധമായി പണിയെടുക്കാറുമുണ്ട്. പോസ്റ്റ് വായിച്ച ഓര്‍മ്മയില്‍ എഴുതിയതാണ്. ഫ്രീവിസ വിസിറ്റ് വിസയായി തെറ്റിദ്ധരിക്കപ്പെട്ടു പോയതാണ്. തെറ്റു പറ്റിയതില്‍ ഖേദിക്കുന്നു.

നന്ദി.

നാടോടി said...

:)

ഏ.ആര്‍. നജീം said...

മുന്‍പെന്നെത്തേക്കാള്‍ കൂടുതല്‍ പോസ്റ്റ്കള്‍ വരുകയും ചിന്തപോലുള്ള അഗ്രിഗേറ്ററുകള്‍ ഇടയ്ക്കിടെ പണിമുടക്കുകയും ഒക്ക് ചെയ്യുന്നത് കൊണ്ടും കാണാനാകാതെ പോകുന്ന പോസ്റ്റുകള്‍ വായിക്കുവാന്‍ താങ്കളുടെ ഈ ഉദ്യമം സഹായകമാകുന്നു എന്നറിയിക്കട്ടെ..
തുടരുക... അഭിനന്ദനങ്ങള്‍..

മന്‍സുര്‍ said...

അഞ്ചല്‍ക്കാര...

ബ്ലോഗ്ഗേര്‍സ്സിനൊരു എളുപ്പ വഴി.....വാരവിചാരം
മിക്ക ബ്ലോഗ്ഗുകളെയും പരിചയപ്പെടുത്തുക വഴി ഈ ഒരൊറ്റ ബ്ലോഗ്ഗിലൂടെ മറ്റ്‌ ബ്ലോഗ്ഗുകളിലേക്ക്‌ എത്തിചേരാന്‍ കഴിയുന്നു. പലപ്പോഴും കണ്ടിട്ടും അത്ര പ്രാധാന്യം കൊടുക്കാതെ പോകുന്ന പല ബ്ലോഗ്ഗുകളുടെയും വിഷയങ്ങള്‍ ഈ വാരവിചാരത്തിലൂടെ വായിച്ച്‌ തിരിച്ച്‌ പോയി കമന്‍റ്റുകള്‍ കൊടുത്ത നിരവധി സംഭവങ്ങള്‍ അനുഭവം.

പുതിയ ബ്ലോഗ്ഗേര്‍സ്സിന്‌ പഴയ ബ്ലോഗ്ഗേര്‍സ്സിനെയറിയാനും...പുതിയ ബ്ലോഗ്ഗേര്‍സ്സിന്‌ മറ്റുള്ളവരെ കണ്ടേത്താനും ഈ വാര വിചാരം ബ്ലോഗ്ഗേര്‍സ്സ്‌ വേദിയായി മാറുന്നു എന്നതില്‍ സന്തോഷമുണ്ട്‌.

വിലപ്പെട്ട സമയങ്ങള്‍ ഇത്തരം ഉപകാരപ്രദമായ സംരംഭങ്ങള്‍ക്ക്‌ വേണ്ടി നീക്കി വെക്കുന്ന ഷിഹാബുവിന്‌ സ്നേഹാഭിനന്ദനങ്ങള്‍.

വാര വിചാരത്തിന്‌ എല്ലാ ഭാവുകങ്ങളും നേരുന്നു

നന്‍മകള്‍ നേരുന്നു

Anonymous said...

you are really scanning the essential
regards
sahadevan

ഉഗാണ്ട രണ്ടാമന്‍ said...

പുതിയ ബ്ലോഗ്ഗേര്‍സ്സിന്‌ പഴയ ബ്ലോഗ്ഗേര്‍സ്സിനെയറിയാനും...പുതിയ ബ്ലോഗ്ഗേര്‍സ്സിന്‌ മറ്റുള്ളവരെ കണ്ടേത്താനും ഈ വാര വിചാരം ബ്ലോഗ്ഗേര്‍സ്സ്‌ വേദിയായി മാറുന്നു താങ്കളുടെ ഈ ഉദ്യമം എന്നറിയിക്കട്ടെ..
തുടരുക... അഭിനന്ദനങ്ങള്‍..

സിമി said...

അഞ്ചല്‍ക്കാരാ, അടുത്ത ലക്കം വാര്‍ഷിക വിചാരം വേണം. ഈ വര്‍ഷത്തെ ആകെ ഒന്നു കലക്കിക്കുടിച്ച് ഒരു വിചാരം. കഥ / കവിത /ഉപന്യാസം / നേരമ്പോക്ക് / ഇങ്ങനെയിങ്ങനെ, അല്ലെങ്കില്‍ എങ്ങനെ ആയാലും :-) 2007 മലയാളം ബ്ലോഗുകളിലേയ്ക്കൊരു തിരനോട്ടം വേണം.

വേണു venu said...

സിമിയുടെ കമന്‍റിന്‍ താഴെ ഒപ്പു വയ്ക്കുന്നു.